Heill sé þér fertugum Ægir!

Varðskipið Ægir, sem nú er fertugt og komið á efri ár ef svo má segja um lífaldur skipa, var helsta vopn okkar í  50 mílna  þorskastríðinu við  Breta frá  1972 til  1974.  Ægir var flaggskip okkar allt þangað til systurskip þess Týr kom til landsins undir lok þess stríðs. Skipherra Ægis var lengst af Guðmundur Kærnested. Óhætt er að fullyrða að farsælar lyktir landhelgisdeilunnar er ekki síst hægt að þakka þessu skipi og áhöf þess.   Fyrir það vil ég þakka.                 

Ægir í fullu fjöri á fertugsafmælinu

Hundaæði á Suðurnesjum!

 Það er enginn hundur í Suðurnesjamönnum þessa dagana, þvert á móti hefur gripið um  sig hundaæði og margir þeirra komnir í hundana. (Ekki farnir í hundana)

Hundur á hverja tuttugu íbúa á Suðurnesjum

Geir taki Bush sér til fyrirmyndar

Það er ekki bara á Íslandi sem þjóðarleiðtogum leiðist að þurfa að taka tillit til mannréttinda. Til dæmis hundleiðist Bush að þurfa að gera það en hann ætlar samt að hlíta dómi. Geir Haarde hefur margsagt að hann þurfi ekki að fara að úrskurði mannréttindanefndarinnar og er búinn að steingleyma að Ísland hefur skuldbundið sig til þess. Ég veit ekki hvort það er alltaf heppilegt hjá forystumönnum Sjálfstæðisflokksins að líta á Bush sem fyrirmynd en Geir mætti gera það núna.

 

 

 

 

Bush er fúll en lætur sig hafa það.  Geir ætti að gera það líka.

Bush segist hlíta dómi

Af hverju vill ríkisstjórnin viðhalda mannréttindabrotum?

Frjálslyndi flokkurinn var fyrst of fremst stofnaður til höfuðs mannréttindabrotum í sjávarútvegi.     Hann vill skynsamlegri og réttlátri nýtingu sjávarauðlindarinnar byggðunum og þjóðinni til heilla og afnema kvótakerfið sem leiðir til brottkasts. Stjórnvöld vilja verja misskiptinguna í formi lénaskipulags, þó hún leiði til byggðaröskunar, sóunar verðmæta vegna brottkasts, skarðari hlut  vistvænna fiskveiða, minnkandi fiskistofna og lægri tekna fiskimanna og fiskverkafólks, hafi leitt til skuldsetinnar greinarinnar auk þess sem hún kemur í veg fyrir endurnýjun í greininni.  Þetta sem misvitrir stjórnmálamenn kalla "besta fiskveiðistjórnunarkerfi heimsins" hefur í raun kostað þjóðarbúið hundruð milljarða í tekjum og er þá ekki tekið tillit til byggðaröskunar. Þessu vilja stjórnvöld ekki breyta, röksemdirnar eru þær að mannréttindabrotin hafi varað svo lengi.  Geir og Ingibjörg keppast við að lýsa því yfir að ekki þurfi að fara að úrskurði mannréttindanefndarinnar enda sé þetta bara hennar álit.  Vita forsætis- og utanríkisráðherra ekki að Ísland skuldbatt sig til að fara að úrskurði nefndarinnar?  

Að gefnu tilefni þurfum við að tryggja að auðlindir þjóðarinnar verði ekki einkavinavæddar og Íslendingar sitji við sama borð þegar kemur að nýtingu þeirra.  

 

Olíukreppa, hagur Íslands?

Sú var tíðin að menn litu á olíuverðshækkanir sem mikla ógn fyrir viðskiptajöfnuðinn. Þessu hefur orðið meiri breyting á en margur áttar sig á. Nú er svo komið að landið flytur út svipað magn orku í formi áls og járnblendis og flutt er inn af fljótandi eldsneyti á farartæki lofts, láðs og lagar.  Að vísu eru stærstu sölusamningar okkar á raforku margir til langs tíma þar sem verðið er langt undir heimsmarkaðsverði. Þannig var atvinnuástandið á Austfjörðum notað sem skálkaskjól fyrir óhagstæða raforkusamninga til 40 ára. Háhitasvæðin eru gríðarleg náttúruleg og endurnýjanleg auðlind sem getur orðið Íslendingum til hagsbóta ef þeir sýna fyrirhyggju.

En það fer furðu hljótt um stóra lottóvinninginn sem Íslendingar geta verið með við Jan Mayen þar sem miklar  líkur eru á að olía og gas finnist og við eigum vinnsluréttindi ef við sýnum frumkvæði, annars falla þau niður. Norðmenn hafa áhyggjur af því að við verðum fyrri til.  Olíulindirnar ná oft yfir landamæri tveggja eða fleiri ríkja  og því er hægt að soga olíuna upp frá einum stað, því getur þetta orðið kapphlaup.  Kristinn Petursson skrifar um þetta í dag

 

Olían hefur hækkað um 100%

Hvað ef Ísland lenti í öryggisráðinu?

Það hefur lengi legið fyrir að Bush og félaga langar að ráðast á Íran en á sjálfsagt óhægt um vik vegna hernaðarátakanna í Írak. En eins og hann segir heldur hann öllum möguleikum opnum og mun þá væntanlega freista þess að fara með málið fyrir öryggisráðið. Þessa dagana gera stjórnmálamenn flest til að komast í öryggisráðið og hafa meðal annars stofnað til stjórnmálasambands við mannætu í því skyni Sjá hér   Innan stjórnarflokkanna er í gangi samkvæmisleikur þar sem menn spekúlera hver hreppi hnossið og komist í sætið. Verður það Össur eða Árni Matt? Komi til þess að íslenska ríkisstjórnin komist í öryggisráðið geta afleiðingarnar orðið eftirfarandi:

1. Ef Íslendingar hafna innrás gera þeir Bush og hans menn fúla.

2. Íslendingar samþykkja innrás og fá múslima upp á móti sér.

Þannig gæti þessi kostnaðarsami samkvæmisleikur, sem menn héldu að snérist um að útvaldir lyfti kristalsglösum með dýrum vínum og þiggji góð skattfrjáls laun, snúist upp í leiðindi.

 

Verður Össur eða Árni Matt fyrir valinu?

Bush: Vonast eftir friðsamlegri lausn á deilunni við Íran

Þórshöfn, Nuuk og Reykjavík

Ég hef alltaf fundið til samkenndar með vinum okkar á Grænlandi og Fjáreyjum, kannski vegna þess að ég var fiskimaður og uppalinn við að borða sigin fisk og selspik en án alls gríns þá eigum við gríðarlega mikla sameiginlega hagsmuni ekki síst í hafinu sem umlykur lönd okkar.  Ég fagna því að borgarstjóri skuli rækta þessi tengsl. Samfylkingarmenn sem virðast hafa minni áhuga á Vest-norrænum tengslum skýrðu gríðarlegan ferðakostnað sinn með því að munurinn á þeim og Ólafi væri sá að þeir sinntu skyldum sínum í fjarlægum löndum en hann (Ólafur) væri flughræddur.

Sýnir þetta ekki að þeir fljúga lágflug eins og þeir virðast best fiðraðir til?

Borgarstjóri í Færeyjum

Andfúll og eitraður koss!

 

 

 

 

 

Þessi eitraði koss insiglaði stuðning Samfylkingarinnar við mannréttindabrot á sjómönnum út kjörtímabilið.

Styrmir kveður

Það er örugglega ekki létt verk að taka við af Styrmi Gunnarssyni ritstjóra Morgunblaðsins og fáum ef nokkrum betur treyst til þess en Ólafi Þ. Stephensen, sem hefur vaxið með hverjum vanda eins og hann á ætt til.

Vonandi mun Styrmir samt ekki hætta þátttöku í þjóðmálaumræðu, þá væri skarð fyrir skildi.  

Ritstjóraskipti á Morgunblaðinu

Ríkisstjórnin ætlar ekki að virða mannréttindi á Íslandi

Ríkisstjórnin hefur nú lýst því yfir að hún ætlar að hundsa niðurstöðu Mannréttindanefndar Sameinuðu þjóðanna og greiða ekki bætur til þeirra manna sem mannréttindi voru brotin á eins og mannréttindanefndin ályktaði að skyldi gert.

Margir hæstaréttarlögmenn og fyrrum hæstaréttardómari hafa fullyrt að úrskurður nefndarinnar sé bindandi að þjóðarrétti. Það gerir líka Aðalheiður  Ámundadóttir laganemi sem unnið hefur að ritgerð um álit mannréttindanefndarinnar, um mál þetta segir hún: "Má þar fyrst nefna að Íslenska ríkið hefur fullgilt hina 'valfrjálsu bókun' þess efnis að einstaklingar geti sent erindi til nefndarinnar til umsagnar. Bókunin er sérstakur viðauki við mannréttindasamninginn og því sérstakur þjóðréttarsamningur. Að auki er bókunin valfrjáls og ríkinu bar engin skylda til að fullgilda hana. Ríkið gerði það hins vegar og því er ansi fjarstæðukennt að ætla nú að hafa það að engu."

Bæði Geir Haarde og Ingibjörg Sólrún Gísladóttir hafa lýst því yfir að að ríkisstjórninni beri ekki að virða þennan úrskurð. Þau hafa þessi í stað ákveðið að þæfa málið í nefnd og segjat ætla að fikra sig í átt að áliti mannréttindanefndarinnar á löngum tíma. Byrjunin lofar ekki góðu þ.e. að neita að greiða nokkrar bætur til þeirra einstaklinga sem sannanlega voru brotin mannréttindi á.   

 

 

Ekki forsendur til að greiða skaðabætur