Bæjarstjóraskiptin í Grindavík, hver er kjarni málsins?

Ég réri frá Grindavík meðan ég var í Stýrimannaskólanum og er hlýtt til staðarins síðan, enda býr þar duglegt og gott fólk. Mörgum rennur til rifja hvernig Samfylkingin fer með almannafé í tengslum við bæjarstjóraskiptin. En það er ekki síður mikilvægt að væntanlegur bæjarstjóri þekki þann grundvöll sem bæjarfélagið og velgnengni þess byggir á. 

Grindavík á sér merka sögu, sem Landnáma greinir frá: Fyrstu ábúendur Grindavíkur þeirra Molda- Gnúpur og Járngerðar, sem varð fimm barna auðið, synir þeirra voru miklir fiskimenn "enda fylgdu landvættir þeim til róðra". Meðal fjögurra sona þeirra var Hafur- Björn, sem var fyrsti þingmaður Grindvíkinga á Alþingi við Öxará árið 930.  Hann naut fulltingis landvætta eins og áður greinir en var ekki síst frægur fyrir að koma upp geitarstofni í Grindavík, þrátt fyrir að eiga engan hafur en bergbúi leysti úr þeim vanda og varð hann auðugur bóndi.

Þetta rifjast upp fyrir mér nú þar sem tilvonandi bæjarstjóri séra Jónina Kristín Þorvaldsdóttir, vakti meðal þorpsbúa mikið hræðslufár varðandi athöfn í Sólarvéum, fyrir nokkrum árum. Hún taldi að það  sérstaklaga ámælisvert  að heiðinn maður, sem hlóð véið hefði komið að athöfninni og að þetta gengi ekki upp "þar sem Grindvíkingar væru margir fiskimenn".  Þessi orð voru ómakleg enda  er mér til efs að bergbúar og landvættir hafi komið meir að uppbyggingu nokkurs bæjarfélags ef marka má frásögn Landnámu.

 Ég vona að tilvonandi bæjarstjóri, sem er aðkomumaður,  kynni sér sögu staðarins og sýni landvættum og bergbúum tilhlýðilega virðingu, því það er lykillinn að velgengni bæjarfélagsins.

Nýr hestur í miðri á.

Gunnari Guðmundssyni þjálfara HK var sagt upp í dag, þar sem árangur liðsins er undir væntingum, þrátt fyrir mjög góðan árangur hans undanfarin ár.  Sem knattspyrnuáhugamaður fullyrði ég að Gunnar er ekki versti þjálfari Landsbankadeildar karla, árangurinn er ekki til að hrópa húrra fyrir núna í byrjun en á það ber að líta að HK er ekki heldur stjörnum prýtt lið eins og sum sem eru lítið eitt ofar. En hvort sem þetta er sanngjarnt eða ekki þá orkar alltaf tvímælis  að skipta um hest á sundreið í straumharðri  á þótt hrossið beri tímabundið af leið undan þungum straumnum. Vonandi farnast báðum vel.

Gunnar Guðmundsson á góðum degi 

Gunnari sagt upp sem þjálfara HK

"Stelpurnar okkar"

Það var sannarlega gaman að fylgjast með landsleik íslenska kvennaliðsins í knattspyrnu etja kapp við slóvenskar stöllur sínar. Í húfi var réttur til umspils um að komast á sjálft Evrópumótið. Kvennaliðið  hefur aldrei verið betra og áhugi fyrir kvennaknattspyrnunni er í stöðugri sókn enda var mætingin með besta móti. Það var rífandi stemning í blíðskaparveðri í dalnum og stelpurnar höfðu greinilega gaman af þessu og voru einum gæðaflokki betri en þær slóvensku.  Þær voru allar frábærar í dag en að öllum ólöstuðum vil ég hæla Katrínu Jónsdóttur fyrirliða og Margréti Láru, sem skoraði þrennu og fór af velli þegar 33 mínútur voru eftir.  Mér sýndist hún verða fyrir einhverju hnjaski og vona að það sé ekki alvarlegt.                                 

 

Stelpurnar eiga það skilið að þjóðin standi með þeim.

Ísland vann stórsigur á Slóveníu

Reis upp frá dauðum

Kraftaverkin gerast enn. Gefið var út dánarvottorð á sjúkrahúsi á Indlandi fyrir barn sem fæddist andvana enda hafði það hvorki hjartslátt né púls. Við útförina vaknaði barnið til lífsins. Það er greinilega margt yfirskilvitlegt í þessum heimi.

 

Látið barn vaknaði til lífsins

Dómar fyrir guðlast

Við Íslendingar skiljum ekkert í firna þungum dómum í ýmsum múslimaríkjum vegna guðlasts. Sjálfur tel ég að guðir séu ekkert sérlega uppnæmir fyrir leiðinlegu umtali um sig, hvort sem það er byggt á misskilningi eða hreinni meinbægni. Enda eru allir alvöru guðir með með breitt bak og veraldarvanari en svo að kippa sér upp við eitthvað nagg og nöldur um sjálfan sig. Enda hafa þeir annað og meira við sinn tíma að gera. Þetta er viðtekinn skilningur flestra Íslendinga í dag en svo hefur þó ekki alltaf verið.  Ætli það séu ekki u.þ.b.  40 ár síðan Spegillinn var gerður upptækur og ritstjórinn, Úlfar Þormóðsson, var dæmdur í svo þungar sektir að hann missti aleiguna. Tilefnið var teiknimynd af róna sem sagðist hafa  fengið fyrsta snafsinn við altarisgöngu á fermingardaginn. Þessi ströngu lög eru enn í gildi en þau eru ekki í takt við tíðarandann þannig að þegar Spaugstofumenn voru kærðir af biskupnum fyrir fáeinum árum flissaði þjóðin.

 

 

Úlfari Þormóðssyni var refsað grimmilega.  

Dæmdur til dauða fyrir guðlast

"Heiðursmorð" á Hrauni við Skaga

Ekki tókst  danska sérfræðingnum Carsten Gröndal að skjóta deyfilyfi í dýrið, srem til stóð að bjarga enda eru ísbirnir í mikilli útrýmingarhættu. Miklu hafði verið til kostað til björgunaraðgerðanna fengin var flutningavél með sérstakt búr og til stóð að senda varðskip með dýrið á haf út. Og til að að kóróna herlegheitin mætti umhverfisráðherra til að baða sig í sviðsljómanum. En dýrið vildi ekki láta bjarga sér og flýði  til hafs. En það var dauðasök, þvílíka háðung gagnvart sjálfum umhverfisráðherranum sem var búinn að leggja á sig allt þetta ferðalag var ólíðandi. Það varð að bjarga heiðri ráðherrans og fella dýrið "sem virtist vera sært á fótum".  Þetta var sem sé heiðursmorð.

En ráðherrann sagði að því miður hefði reynst nauðsynlegt að drepa dýrið þar sem það synti á haf út. Veit ráðherrann ekki að einmitt það er ólöglegt sjá 16. gr 

http://www.althingi.is/lagas/nuna/1994064.html

 

 

Ísbjörninn að Hrauni dauður

Heill sé þér fertugum Ægir!

Varðskipið Ægir, sem nú er fertugt og komið á efri ár ef svo má segja um lífaldur skipa, var helsta vopn okkar í  50 mílna  þorskastríðinu við  Breta frá  1972 til  1974.  Ægir var flaggskip okkar allt þangað til systurskip þess Týr kom til landsins undir lok þess stríðs. Skipherra Ægis var lengst af Guðmundur Kærnested. Óhætt er að fullyrða að farsælar lyktir landhelgisdeilunnar er ekki síst hægt að þakka þessu skipi og áhöf þess.   Fyrir það vil ég þakka.                 

Ægir í fullu fjöri á fertugsafmælinu

Þórshöfn, Nuuk og Reykjavík

Ég hef alltaf fundið til samkenndar með vinum okkar á Grænlandi og Fjáreyjum, kannski vegna þess að ég var fiskimaður og uppalinn við að borða sigin fisk og selspik en án alls gríns þá eigum við gríðarlega mikla sameiginlega hagsmuni ekki síst í hafinu sem umlykur lönd okkar.  Ég fagna því að borgarstjóri skuli rækta þessi tengsl. Samfylkingarmenn sem virðast hafa minni áhuga á Vest-norrænum tengslum skýrðu gríðarlegan ferðakostnað sinn með því að munurinn á þeim og Ólafi væri sá að þeir sinntu skyldum sínum í fjarlægum löndum en hann (Ólafur) væri flughræddur.

Sýnir þetta ekki að þeir fljúga lágflug eins og þeir virðast best fiðraðir til?

Borgarstjóri í Færeyjum

Styrmir kveður

Það er örugglega ekki létt verk að taka við af Styrmi Gunnarssyni ritstjóra Morgunblaðsins og fáum ef nokkrum betur treyst til þess en Ólafi Þ. Stephensen, sem hefur vaxið með hverjum vanda eins og hann á ætt til.

Vonandi mun Styrmir samt ekki hætta þátttöku í þjóðmálaumræðu, þá væri skarð fyrir skildi.  

Ritstjóraskipti á Morgunblaðinu

Grétar í góðum gír!