Opið bréf til allsherjargoða

                                                                                  Ágæti allsherjargoði.

Mörgum er ofarlega í huga hvenær landvættirnar muni grípa í taumana og blanda sér í stjórnmálabaráttuna með afgerandi hætti?

Við ásatrúarmenn og raunar allir Íslendingar aðhyllumst frelsi andans, samt er það æði oft svo að maður leiðir ekki hugann að forræðinu fyrr en það bitnar á manni sjálfum.

Hingað hafa jafnan borist stefnur og straumar utan úr hinum stóra heimi, nú síðast Evrópuhugsjónin, allt hefur þetta gengið yfir eins og flensurnar. 

Forræðishyggjumönnum til yndisauka en gömlum sjómanni, vini mínum til ama eru verjur einungis leyfðar í einni EB-stærð og hefur hann því þurft að útvega sér þessa munaðarvöru frá Ameríku, þar sem enginn amast við því að þessi vöðvi, sem ekki má nefna, sé ekki af staðlaðri stærð.   Við brosum kannski að þessum vandræðum vinar míns sem ber harm sinn í hljóði.

Nái óskir samforræðishyggjumanna  fram að ganga verður Kjartani sægreifa innan tíðar gert að hætta að selja vinsælasta réttinn sinn hvalkjöt.

Hvalveiðimennirnir, segja sambræðingssinnar og yppta öxlum: Geta þeir ekki fundið sér eitthvað annað? Það skapast ný mörg störf þegar fjölgar um rúman helming í ráðuneytunum.

Kannski rekur það mig til að hafa samkennd með þessu fólki að ættingjar mínir hafa komið saman svo lengi sem elstu menn muna og borðað ólöglegar afurðir þ.e. sel, þetta köllum við selskap sem við hugsum ávalt til með mikilli tilhlökkun.  Nú skilst mér að þetta sé þyrnir í augum Evrópuhugsjónamanna sem myndu heldur vilja sjá okkur  Skógarnesinga borða evrópskt svínakjöt.

Allt eru þetta þó smámunir í samanburði við þá fyrirætlan Evrópuhugsjónamanna að gera okkur frjálsborna Íslendinga ásamt óbornum niðjum okkar að Ísþrælum, "sem afsala sér griðum óafturkallanlega og ótímabundið" (Icesave samn.), til þess eins að kaupa aðgöngumiða í "Kæfubelginn Brussel".

Því heiti ég á þig ágæti allsherjargoðai, að þú beitir tafarlaust áhrifum þínum við landvættirnar þannig að  þær bægi þessari ógn, Evrópuhugsjóninni, frá landinu áður en hún veldur hér skaða.

 

 

 

Frestun Icesave slæmur kostur

Athugasemdir

[Loftur Altice Þorsteinsson, 18.7.2009 kl. 09:40]

Góður pistill Sigurður. Ég sé að við deilum mörgum viðhorfum, þótt önnur detti á milli veggja.

Kveðja.

[Árni Gunnarsson, 18.7.2009 kl. 14:46]

Þakka þér fyrir þessa góðu og þörfu hugvekju frændi minn af Skógarnesætt. Betur að þessi gullnu og sönnu gildi ásatrúarmanna fengju hljómgrunn í samfélaginu og landníðingar málmbræðsluhugsjóna yrðu settir til geymslu í þann kæfubelg sem slíkum görmum hæfir.

Sú var tíð á Íslandi að mikilsvirtir höldar dóu inn í fjöll og hurfu til síns uppruna með óttalausum hug. Í dag eru þær blauðu mannleysur sem hafa af græðgi níðst á landi sínu sem og öllu því öðru sem þeim var til trúað- grátnir til heljar með yfirsöng og tilvitnun í elnhvern löngu dauðan mann sem þarf að undirgangast þá skyldu að hafa dáið fyrir allar þeirra syndir.

---------------------------------------------------------------------------------------------

               Völuvísa Guðmundar Böðvarssonar

   Eitt verð ég að segja þér áður en ég dey,

enda skalt þú börnum þínum kenna fræði mín,

sögðu mér það álfarnir í Suðurey,

sögðu mér það dvergarnir í Norðurey,

sögðu mér það gullinmura og gleymmérei

og gleymdu því ei:

að hefnist þeim er svíkur sína huldumey,

honum verður erfiður dauðinn.

    Og síðasta erindi Guðmundar úr kvæðinu Bræðravíg

Vita mátt að löngum að öldum liðnum

lögð eru mál í gerð.

Gott er með þeim er fyrir heiður og frelsi

féllu með brugðið sverð.

Hér munu vættir og hátignir fornra jökla

horfa á ójafnan leik.

Sá er óragur einn er til þrautar varðist,

aldrei á hæli veik.

[Óskar Helgi Helgason (IP-tala skráð) 18.7.2009 kl. 15:37]

Heill og sæll; Sigurður - sem aðrir hér; hverjir geyma og brúka, síðuna !

Lítt; hefir borið á kappsemi Allsherjagoða, til liðveizlu við þá landsins þegna, sem undir valdastéttinni hafa marist, fram til þessa.

Skárra væri þó; tæki Goði allsherjar, upp þá háttu, að standa í mót illræðis öflum þeim, hver nú véla um völd og áhrif.

Að minnsta kosti; væri hann líklegri til, en Byskup Lútherskra, hver geiflar sig, við og við, í tilgerðarlegri hræsni sinni, sem sjálfs upphafningu, til þess eins, að verða allra viðhlæjandi, enda,........ seint talinn til stórmenna, svo sem.

Með beztu kveðjum - sem áður og fyrri; úr Árnesþingi /

Óskar Helgi Helgason   

[Jón Valur Jensson, 18.7.2009 kl. 17:33]

Skemmtilega skrifaður pistill hjá þér, Sigurður!

[Helga Þórðardóttir, 18.7.2009 kl. 23:52]

Mér er nokkuð sama um smokkin en hef þó nokkra samúð með vini þínum. Verra þykir mér að mega ekki borða sel.

[Auðun Gíslason, 19.7.2009 kl. 18:48]

frá Steingrími J. Sigfússyni

16.7.2009 Ágætu félagar,Alþingi hefur nú samþykkt að Ísland óski eftir því að hefja aðildarviðræður við Evrópusambandið og að möguleg niðurstaða þeirra verði lögð í dóm kjósenda. Höfum það þó í huga að enn hefur engin ákvörðun verið tekin um að ganga í Evrópusambandið, hún verður ekki tekin fyrr en öll spil hafa verið lögð á borðið og það verður þjóðin sem mun taka hana komi til þess. Þannig er þessi niðurstaða vel samrýmanleg landfundarályktun í mars síðastliðnum sem lögð var fram í kjölfar mikils starfs innan flokksins sem allir flokksmenn gátu tekið þátt í.Vinstrihreyfingin – grænt framboð telur nú sem fyrr að hagsmunum Íslands sé best borgið utan Evrópusambandsins. Sjálfsagt er og brýnt að fram fari opin og lýðræðisleg umræða um samskipti Íslands og sambandsins. Landsfundur VG leggur áherslu á að aðild íslands að ESB eigi að leiða til lykta í þjóðaratkvæðagreiðslu.Vissulega voru uppi hugmyndir um leiða málið til lykta á annan hátt og mörgum innan okkar raða er það óljúft að standa yfir höfuð að nokkurri hreyfingu málsins í þessa átt. Ég dreg enga dul á að þetta mál hefur verið erfitt fyrir mig eins og okkur öll enda hefur flokkurinn frá upphafi tekið afstöðu gegn aðild Ísland að sambandinu. Þessi leið varð hins vegar niðurstaða stjórnarmyndunarviðræðna við Samfylkinguna og fékk yfirgnæfandi stuðning á flokksráðsfundi. Á þeim fundi kom í ljós eindreginn vilji til að mynda velferðarstjórn að norrænni fyrirmynd með Samfylkingunni og að myndun slíkrar stjórnar ætti að varða veginn fyrir endurreisn íslensks samfélags.Nú munu væntanlega hefjast aðildarviðræður við Evrópusambandið. Með aðild sinni að ríkisstjórn getur Vinstrihreyfingin – grænt framboð haldið stefnu sinni og sjónarmiðum til haga á öllum stigum þeirra. Við munum leggja áherslu á að staðið verði vörð um íslenskan sjávarútveg og landbúnað, yfirráð þjóðarinnar yfir auðlindum sínum, velferðarkerfið og félagsleg réttindi og síðast en ekki síst lýðræðið sjálft. Leiði viðræðurnar af sér aðildarsamning þá verður hann rækilega kynntur fyrir þjóðinni og þannig tryggt að hún verði í aðstöðu til þess að taka upplýsta afstöðu til málsins. Komi það hins vegar í ljós að engan þann skilning á sérstöðu eða grundvallarhagsmunum Íslands verði að finna hjá viðsemjendum okkar að það gefi tilefni til að halda viðræðum áfram, þá höfum við einnig gert það alveg ljóst að við áskiljum okkur rétt til að leggja til á hvaða stigi sem er að þeim verði hætt. Kæru félagar, það er mikilvægt að við látum þetta mál, sem ég veit að afar skiptar skoðanir eru um innan hreyfingarinnar, ekki sundra okkur. Ákvörðun um aðild Íslands að Evrópusambandinu hefur nú verið sett í ferli sem mun annað tveggja leiða til þess að viðræðum verður hætt náist enginn viðunandi árangur eða að þjóðin á lýðræðislegan hátt gerir út um málið. Við þurfum á næstu mánuðum og misserum að sameina kraftana í glímunni við erfiðleikana hér heima. Til þess að sigrast á þeim þarf að grípa til margvíslegra og erfiðra ráðstafana, en við höfum þá trú að það sé betra að við gerum það sem gera þarf heldur en setja málin aftur í hendur þeirra sem bera höfuð ábyrð, bæði pólitískt og hugmyndafræðilega, á óförum okkar.Hér á eftir fylgir sú atkvæðaskýring sem ég flutti við upphaf afgreiðslu málsins í dag:

Þegar tillaga þessi um aðildarumsókn að Evrópusambandinu kemur til lokaafgreiðslu vil ég árétta þá grundvallarstefnu Vinstrihreyfingarinnar græns framboðs að það þjóni ekki hagsmunum Íslands að gerast aðili. Við greiðum atkvæði um það hér á eftir hvort rétt sé eftir sem áður að láta reyna á í viðræðum hvers konar samningi sé hægt að ná til þess að þjóðin geti að því loknu hafnað eða samþykkt niðurstöðuna komi til hennar. Þingmenn Vg  eru bundnir af engu nema eigin sannfæringu varðandi það hvort sú leið skuli farinn. Hvoru tveggja afstaðan, að vera með því eða á móti er vel samrýmanleg stefnu flokksins. Öll eigum við það sameiginlegt að áskylja okkur rétt til málflutnings og baráttu utan þings sem innan í samræmi við grundvallaráherslur flokksins og okkar skoðun. Það tekur einnig til þess að hvort sem heldur er leggja til á hvaða stigi viðræðna við Evrópusambandið sem er, komi til þeirra, að þeim verði hætt ef þær eru ekki  að skila fullnægjandi árangri gagnvart grundvallarhagsmunum Íslands sem og að leggjast gegn óviðunandi samningsniðurstöðu.

Það er að sjálfsögðu alsendis óviðeigandi að gera upp á milli ykkar frændanna hér þannig að ávarp hins ástsæla leiðtoga vor sendi ég þér!  Því miður verð ég að játa að þú hefur valið þér annan leiðtoga í lífinu.  Vonandi breytist það nú samt með haustinu.  Byltingarkveðja til þín og Árna frænda þíns!  )Að  vísu er kaupfélagsleiðtoginn ekki byltingarsinnaður, en það verður að hafa það!)

[Arnar Guðmundsson, 21.7.2009 kl. 14:47]

EIR HEIR

[brahim, 21.7.2009 kl. 15:19]

Skemmtlegur pistill Sigurður.

Má þó til með að leiðrétta 1 orð...vöðvin sem ekki má nefna er ekki vöðvi heldur vefur líkt og er í maga og lifur...enda væri þá hægt að stækka hann frá því að vera S - XL

[Guðsteinn Haukur Barkarson, 21.7.2009 kl. 21:00]

Öhömm ... ég signi mig bara, ... skemmtilegur pistill Siggi. 

[Þorri Almennings Forni Loftski, 22.7.2009 kl. 00:42]

Hilmar Örn lýsti yfir stuðningi við ESB inngöngu 1995. Svo það var óþarfi að skrifa bréfið Siggi. Mörg ólögleg nautnin er blótuð á laun um allan heim og mun verða svo áfram.

Fjölgyðismenn ættu frekar að fagna því að loks komumst við aftur í fjölbreytnina, fjölhyggju siðmenningarinnar, eftir aldagamla undirokun rétttrúnarberserkja.

[Sigurður Þórðarson, 22.7.2009 kl. 11:31]

Þakka ykkur öllum saman.

Þorri, það tekur oft skemmri tíma en 9 ár hjá fólki að vitkast, jafnvel þó það sé ekki allsherjargoðar.  Hilmar þakkaði mér bréfið og hefur tekið það til vinsamlegrar íhugunar.

[Þorri Almennings Forni Loftski, 22.7.2009 kl. 15:01]

Vinsamleg íhugun þýðir ekkert. Svona almenn kurteisi, Sigurður.

[Sigurður Þórðarson, 22.7.2009 kl. 23:21]

Já Þorri við vitum að Hilmar voinur okkar er afar kurteis maður. Ég er samt að svo komnu máli ekki tilbúinn til að kyngja því að að hafa farið í geitarhús að leita ullar.

Besgt væri ef Hilmar tæki sjálfur af tvímæli.

[Ásthildur Cesil Þórðardóttir, 27.7.2009 kl. 10:51]

Ég tek undir þessa ósk um að landvættir beiti sér í málinu. 

[Sigurður Þórðarson, 27.7.2009 kl. 16:51]

Komdu nú fagnandi Ásthildur og velkomin til Íslands!

[Þorri Almennings Forni Loftski, 28.7.2009 kl. 15:47]

Landvættirnar hafa aldrei þolað þessa þjóð og væru vafalaust fegnar að losna við hana.

[Jens Guð, 28.7.2009 kl. 22:50]

  Ég kvitta undir ákall þitt til allsherjargoða. 

[Sigurður Þórðarson, 28.7.2009 kl. 23:28]

Takk fyrir innlitið Jens.

Ég þykist vitað að allsherjargoði muni svara hér á síðunni innan sólarhrings.

[Hilmar Örn Hilmarsson (IP-tala skráð) 29.7.2009 kl. 20:34]

Heill og sæll Sigurður

Geri hér aðra tilraun til að svara þér: fyrri tilraun sogaðist ofaní svarthol bínaríkóðans. Ég vil byrja á því að þakka þér gott og þarft innlegg og ekki fannst mér síðra að lesa framlag annars lauks Skógarnesættarinnar því á undanförnum mánuðum hafa orð Guðmundar Böðvarssonar verið mér afar hugstæð. Mér þykir öllu verra að fá óumbeðna inngöngu Evrópusambandið, nokkuð sem minnir mig á þann sið að skíra látna forfeður og formæður inn trúarsamfélag að þeim forspurðum. Árið 1995 var ég búsettur í Danaveldi og undi glaður við mitt ( þótt rótgróið Danahatur, segi og skrifa, hafi nokkrum misserum síðar blossað upp á ný... ) og ESB var hugtak sem ég minnist ekki hafi hvarflað að mér á þeim tíma. Nokkrum árum fyrr skrifaði ég hins vegar uppá plagg þar sem menn hvöttu til víðtækara Evrópusamstarfs og þar var ég hugsanlega af sjó dreginn vegna Evrópsku kvikmyndaverðlaunanna sem mér hlotnuðust 1991.

Ég skal viðurkenna að á árum áður sá ég öll Evrópubandalög í öllu rómantískara ljósi en nú, ekki síst vegna þess að þegar ég dvaldi um tíma í ákveðnum löndum þurfti ég á nokkura mánaða fresti að ferðast yfir landamæri til þess að fá endurnýjaða vegabréfsáritun. En þetta breytir ekki því að erlend yfirráð og erlend íhlutun hefur ætíð verið eitur í mínum beinum. Ég hef staðið fyrir athöfnum, við lítinn fögnuð sumra félagsmanna, þar sem ég hef tæpitungulaust talað gegn erlendu ofurvaldi, fyrst á Kárahnjúkum þar sem fallið á sér rætur, síðan í Laugardal þar sem sem bresk yfirvöld og hrunadansbandið innlenda fengu það sem þeim bar og síðan á Þingvöllum á sama tíma og goðar í öllum landsfjórðungum hétu á vættir landsins í Borgarfirði, Eyjarfirði, Vopnafirði og á Reykjanesi. Ég var að koma heim um helgina eftir hringferð um landið þar sem ég fór á þessar slóðir og hét á allar góðar vættir landi og þjóð til heilla. -Það verður að viðurkennast að fyrir austan lagði ég mesta áherslu á Reyðarfjörð og sú dreypifórn sem þar var færð við jötnabústað einn var hvorki mjöður né bjór.

Nú hefur skáldmæringurinn Þorri vinur okkar talsvert verið að yrkja á ensku og því ætla ég að koma útúr skápnum með fyrstu og einu oddhenduna sem ég hef ort á þeirri tungu:

In London town this lying clown,

our land he drowns and shatters,

Gordon Brown is going down

his good renown in tatters.

Þetta litla ljóð sendi ég inn á Guardianvefinn við mismikla hrifningu ásamt smá sögulegum viðauka um kraftaskáld og fór þetta víðar. Ég er svo illa innrættur að allar götur síðan hef ég skemmt mér yfir fjörbrotum Brúnka þó að þetta hefði mátt ganga fljótar fyrir sig. En ég er ekki betra skáld en það og því heiti ég á alla þá sem hafa fengið betri hlut en ég af miðinum að leggja sitt af mörkum.

Nú er verið að undirbúa vígslu minnisvarða um Sveinbjörn heitinn Beinteinsson sem verður reistur á lóð okkar í Öskjuhlíð. Í hans anda munum við kalla til goð, gyðjur og allar góðar vættir landinu til verndar. Oft var þörf en nú er nauðsyn, -verið velkomin hvaða trú sem þið aðhyllist, þó þetta verði ekki sykurhúðað frekar en fyrri daginn.

Bestu kveðjur

Hilmar Örn

[Sigurður Þórðarson, 29.7.2009 kl. 23:30]

Ágæti allsherjargoði, ég þakka þér innilega fyrir þitt góða svar en ekki síst fyrir að taka erindi mínu svona vel.  Mér þykir gott til þess að vita að þú munir innan tíðar  í Öskjuhlíðinni kalla goð og góðar vættir til að veita okkur styrk og stoð landinu til verndar.  Eða og allsherjargoði orðar það: " Oft var þörf en nú er nauðsyn, -verið velkomin hvaða trú sem þið aðhyllist"

[Óskar Helgi Helgason (IP-tala skráð) 30.7.2009 kl. 00:50]

Heill og sæll; Sigurður - sem og, þið önnur, hér á síðu !

Þakkar vert; er ávarp Hilmars Arnar, okkur til handa. Vel; fór hann, með Jarps (Brown´s) kveðlinginn, einnig. 

Mér snýnist; eins og baráttan sé rétt, að hefjast. Samfylkingar fólki, og þeirra förunautum, skyldu engin grið gefin, þá til Loka sennu mun koma.

Til Brussel valla; mættu þau, í friði fara - og dvelja, í tjaldbúðum þeirra Barrosos og Merkel kerlingar, til efsta dags.

Með; hinum beztu kveðjum - sem öðrum fyrri, og áður, úr Árnesþingi /

Óskar Helgi Helgason

[Guðrún María Óskarsdóttir., 30.7.2009 kl. 00:50]

Sæll Sigurður.

Ásatrúarsamfélagið er ein tegund af trúarbrögðum en sjaldan hefur það farist vel að blanda trúarbrögðum í pólítík í ljósi sögunnar.

Mín kristna trú er mér vegarnesti nú sem endranær, áfram veg, en vegur mannsins orð hans og athafnir hafa með það að gera hvernig eitt þjóðfélag kemur til með að vera úr garði gert, allt eftir því, hve mikið menn nota sannleikann, því hann gjörir menn frjálsa.

kv.Guðrún María. 

[Þorri Almennings Forni Loftski, 30.7.2009 kl. 00:58]

Athyglisvert. Svona ja hérna. Þakka complimentið Hilmar. En var þetta ekki komið á skrið fyrir Kárhnjúka brjálæðið t.d. m.a. með kvótakerfi o.s.frv? Stendur valið ekki á milli ESB, Kína og Kana? Hvernig sem fer, fylgja risafyrirtækin útlendu og alþjóðlegu í kjölfarið þar sem nú þegar ríkir fyrirtækjaræði á Íslandi. Ég efast um að menn hafi litð sérstaklega á sig sem Íslendinga á þeim tíma þegar hinn forni siður var iðkaður opinberlega hérlendis. Hvað sem Einari Þveræingi líður. Þótt menn séu alltaf hræddir við utanaðkomandi ótömdu og óþekktu skepnurnar. Ágætt að vera gestrisinn en passa sitt.

[Vilhjálmur Örn Vilhjálmsson, 30.7.2009 kl. 07:00]

Þú ferð á kostum Sigurður.

Getur nú ekki einhver helgislepjan beðið biskup um að spyrja Drottinn hvort hann sé ekki til í að vernda okkur frá öllu illu sem Brussan Ella, portkona ESB, hefur upp á að bjóða í skauti sínu.

[Sigurður Þórðarson, 30.7.2009 kl. 09:02]

Sæll Óskar, og þakka þér fyrir innleggið. Hvernig væri nú ef Össur færi á fund hins breska flokksbróður síns Jarps, gerðist hirðmaður hans og hefði vetursetu. Þá gæti hann ort dróttkvæði til að milda tilvonandi yfirmann sinn í Evrópusambandinu.

[Sigurður Þórðarson, 30.7.2009 kl. 09:20]

Sæl Guðrún mín.

"Víst er Jesú kóngur klár" og síst af öllu hef ég nokkuð á móti honum, raunar þvert á móti. Ég þykist raunar vita að hann sjái í gegnum fingur við mig þó ég blóti goðin í laumi.  Ég les nú ekki með sama hætti í söguna og þú Guðrún.  Í upphafi þjóðveldisins sátu goðar í Lögréttu enda voru þeir goðorðsmenn og fluttu orð frá goðum. Á þessu tímabili ríkti friður í landinu . "Með lögum skal land byggja"   Í dag fara þingmenn í kirkju við þingsetningu og er það gamall og góður siður. 

Ég get nú samt ekki beinlínis sagt að þingmennirnir okkar við Austurvöll séu allir innblásnir. Kannski ættu þeir að huga að æðri gildum en hætta að hugsa um að slá alla um lán sem ófæddum börnum er ætlað að borga.

[Sigurður Þórðarson, 30.7.2009 kl. 09:34]

Sæll Vilhjálmur Örn.

Mér þykir mikið til hólsins koma frá þér enda ert þú með eitt frjóasta bloggið hér á vefnum og gamansamur. Þú er minn mentor og markmið mitt er að keppa að því að standa þér á sporði og verða allsherjargosi á Moggablogginu

[Sigurður Þórðarson, 30.7.2009 kl. 09:38]

Sæll Þorri, og takk fyrir innleggið

þú gerir umræður alltaf frjórri hvot sem maður er samm´la þér eða ekki. 

Það er sjálfsagt að fara víða og vera gestrisinn þegar það á við en 

"ljúfur verður leiður ef lengi situr annars fleti á"

[Þorri Almennings Forni Loftski, 30.7.2009 kl. 16:40]

Sæll Siggi

Þakka hólið. Það væri hræðilegt ef flestir væru sammála mér. Það er það síðasta sem ég ætlast til af öðrum. Einhver verður að sjá um að viðhalda lífi í umræðunni með ögrandi æsingarskrifum.

Varðandi spakmælin þá sagði mér einu sinni ekta náttúrubarn sem flakkaði um og settist upp á fólk. Að listin við að sitja í annara fleti væri tímasetningin, að fara áður en fólk yrði leitt á viðkomandi. Besta leiðin til vinsælda er því að láta sig hverfa reglulega. Ekki eins og íslenskar auglýsingastjörnur sem er ekki hent fyrr en fólk er búið að fá upp í kok.

Kveðjur

Þorri

[Sigurður Þórðarson, 30.7.2009 kl. 20:29]

Það er örugglega mikið til í þessu Þorri , já eins og svo mörgum öðrum spakmælum. "Það er ekkert nýtt undir sólinni"