Dýralæknir nokkur rannsakaði garnir úr veturgömlum sauð

og við lauslega skoðun garnanna virtist sem kreppan yrði dýpst árið 2009. En það er mikið vandaverk að lesa í garnir, einkum sauðagarnir.  Öldruð kona sagði mér að ef vel ætti að vera þyrfti að fletta görnunum og skoða þær að innanverðu. væri það gert kæmi í ljós að lánin eru afborganalaus næstu þrjú árin (fram yfir ætlað kjörtímabil) og ennfremur sæist að við þurfum að borga vexti strax árið 2011.  Þetta yfirsást dýralækninum, sem á sér fullkomlega eðlilega skýringu, Enda sjást þessu atriði naumast í þeim hluta garnanna sem dýralæknirinn skoðaði. Vandi ríkisstjórnarinnar felst m.a. í því að þar á bæ kann enginn að lesa í garnir svo vel sé, ekki einu sinni dýralæknirinn. Þess vegna lagði minnihluti fjárlaganefndar það til að fluttur yrði inn grænlenskur dýralæknir

Athugasemdir

[Baldur Hermannsson, 22.12.2008 kl. 23:38]

Ertu Skagfirðingur, Sigurður? Þú veist að þar í sveit lesa menn jafn auðveldlega í innýfli sauðfjár og þú lest Fréttablaðið. Ég veit ekki hvort eitthvað er að marka Árna. Hann hefur þetta sjálfsagt eftir einhverjum sérfræðingum - en hvers virði hafa þeir reynst, sérfræðingarnir?

[Sigurður Þórðarson, 23.12.2008 kl. 00:39]

Sæll Baldur, nei ég er ekki svo vel ættaður. Reyndar er ég kominn af Vondu fólki undan Jökli allt frá þjóðveldisöld, þökk sé blessuðu vistarbandinu. Þar kunnu menn talsvert fyrir sér í göldrum og mögnuðu seyð til góðs. Ég á aftur á móti góðan vin sem er Skagfirðingur og þykist geta lesið í garnir einkum veðurfar og fjármál auk þess sem  hann getur vakið og magnað þrá kvenna til karla og öfugt. Hann sagðist hafa lært þetta af móður sinni sem magnaði föður hans með görnum til að búa hann til. Það er svo merkilegt að Grænlendingar þekkja þetta líka en ekki veit ég hvort þeir hafi numið fræðin af Eiríki rauða.

[Sigurður Þórðarson, 23.12.2008 kl. 00:46]

P.s.  Baldur ég bið þig að hafa það ekki eftir mér en mig grunar að Árni sem er Hafnarfirði kunni lítið sem ekkert í þessum fræðum.  Ætli ríkisstjórnin hafi  haldið að hann kynni eitthvað í þessu þar sem hann er dýralæknir? Líklega er þar komin skýringin á því af hverju fjármál landstjórnarinnar eru í þvílíkum ólestri.

[Baldur Hermannsson, 23.12.2008 kl. 00:50]

Það er alveg öruggt að fjármálin væru í fínu lagi ef Árni hefði lært að spá í garnir. geir hefði betur haft samráð við þennan vin þinn.

[Sigurður Þórðarson, 23.12.2008 kl. 00:58]

Sammála.

Ég ætla að  fara á fund Geirs og tala við hann um þetta.

[Baldur Hermannsson, 23.12.2008 kl. 01:01]

Hafðu vin þinn með þér - og sauðkind!

[Sigurður Þórðarson, 23.12.2008 kl. 01:09]

Já það er kannski öruggara, sumir þurfa nefnilega að sjá þetta með eigin augum til að  skilja hvernig þar virkar. Það mætti jafnvel hugsa sér að taka fleiri ráðherra í sýnikennslu. "Það er aldrei of seint að læra"

[Jakobína Ingunn Ólafsdóttir, 23.12.2008 kl. 23:20]

Gleðileg jól Sigurður og þakka bloggið

[Rósa Aðalsteinsdóttir, 24.12.2008 kl. 09:36]

Christian Glitter by www.christianglitter.com

Guð gefi þér og þínum Gleðileg Jól og farsæld um ókomin ár.

Vertu Guði falinn

Kær kveðja/Rósa

[Hafsteinn Viðar Ásgeirsson, 24.12.2008 kl. 12:55]

Fín færsla hjá þér Sigurður, en Árna þessum verður ekki bjargað, Þetta er bara spurning um að lágmarka tjónið af kjánanum í þessu ráðuneyti. Skaðinn af honum í sjávarútvegsráðuneytinu er hins vegar óbætanlegur.

[Hafsteinn Viðar Ásgeirsson, 24.12.2008 kl. 12:57]

Nú var ég aðeins of fljótur á mér, átti eftir að setja hér niður jólakveðju til þín og þinna og gæfan fylgi þér á nýju ári.