Frábærar fréttir!

 Snemma í morgun fundu sjófuglar nýja fallega loðnu í þéttum torfum! Þetta eru frábærar fréttir fyrir þjóðarbúið. Þetta þýðir milljarða króna í gjaldeyristekjur sem koma í góðar þarfir nú þegar lokast fyrir erlenda lánsfjármarkaði.

 

 

 

 

 

 

 

 

 

 

 

 

 Kannski höfum við þá efni á að komast í öryggisráðið eftir alltsaman?

Falleg loðna í þéttum torfum

Seðlabankinn heldur uppi vöxtum, gengi og innistæðulausum kaupmætti!

Kæruleysi síðustu ríkisstjórnar, sem staðfest hefur verið af OECD, hefur orðið til þess að Davíð Oddsson seðlabankastjóri er einn og hjálparlaus að kljást við verðbólguna sem ríkisstjórnin undir hans forsæti skóp af forsjárleysi.  Unnið hefur verið að því að koma auðlindum þjóðarinnar til velþóknanlegra og þrátt fyrir sögulegt hámark á verði sjávarafurða skuldar greinin nú 300% af ársveltu.

ISG hefur engar áhyggjur af þessu hún vinnur að því hörðum höndum að auka ríkisútgjöld með því að koma Íslandi í öryggisráðið  

Ótímabær vaxtalækkun leiðir til kjaraskerðingar

Svívirðilegt vanmat á sjófuglum, ofmat á sérfræðingum

 

 

"Hafrannsóknarskipið Árni Friðriksson og sérfæðingar háloftanna"

Það er gríðarlegt fagnaðarefni fyrir sjómenn, fiskverkafólk og raunar allt þjóðarbúið að loðnuveiðar skuli hafnar af fullum krafti. Í morgun greindi RUV frá því að sérfræðingur Hafrannsóknastofnunar um borð í Árna Friðrikssyni hefði fundið loðnutorfuna. Samkvæmt áreiðanlegum heimildum sem ég hef aflað mér voru það sjófuglar sem fyrstir komu auga á torfuna og vöktu athygli á henni með gargi sínu. Það hlýtur að teljast í hæsta máta ósanngjarnt að taka óbætt þennan heiður af fuglunum.

Véfrétt af loðnu

Það eru gömul og ný sannindi að þegar sjórinn er hlýr hverfur loðnan en þá kemur síld og kolmunni og öfugt. Ég man nokkrar vertíðar þar sem maður var nánast úrkula vonar um að það fyndist loðna en skyndilega gaus hún upp eins og hendi væri veifað, og synti að suðurströndinni til að hrygna og deyja.  Og þó allur floti Íslendinga herji á þessa mergð verður hann aldrei hálfdrættingur á við hvali. 

 

Allt fram í andlátið ver loðnan eins og aðrir fiskar helst tíma sínum og kröftum í að næra sig og leitar því stöðugt í æti.  Eitt mælitæki tók því öllum öðrum fram en það voru sjófuglar á sveimi  yfir torfu.  Kannski einhver ætti að benda Hafrannsóknarstofnun á það?

 

Haldið í loðnuleit

Ingibjörg Sólrún vill selja rófuafskurð!

Svo sem kunnugt er hefur mannréttindanefnd hinna sameinuðu þjóða, tekið undir þau sjónarmið fjölmargra sjómanna, að í kvótakerfinu felist mannréttindabrot.  Nú hefur hún komið með, það sem hún kallar lausn á þessum mannréttindabrotum: Hún vill selja byggðakvótann á uppsprengdu verði og gefa blóðpeningana til sjávarbyggðanna sem blæða fyrir kvótakerfið. 

Fólki til upplýsinga þá er byggðakvótinn aðeins 12000 tonn og nemur u.þ.b. 2-3% af heildaraflamarki.  Kílóið vill Ingibjörg selja  á 170 krónur kílóið sem er drjúgur hlutur af 180 krónu vegnu meðalverði þorsks.  Útgerðin hefur þannig heilar 10 kr. til að reka sig. Þessum væntanlegu leiguliðum ríkisins veitir því ekki af styrk úr gefandi hendi ISG.  

Einu sinni heyrði ég um bónda nokkurn sem svelti hundinn sinn og skar af honum rófuna til að gefa honum að éta.  Ingibjörg er ekki svona rausnarleg hún ætlar að selja hundinum rófuafskurðinn!

"Lengi getur vont versnað"!